Die Standloper Radio 94.7 FM

Die Strandloper Radio is ’n Afrikaanse radioprogram wat vanuit Geelong, Victoria in Australië op die senders van die gemeenskapsradiostasie 94.7 The Pulse uitsaai. Die Strandloper is in 2009 gestig. Een van ons hoogtepunte die afgelope jaar was dat ons ’n bykomende uur toegestaan is en nou elke week ’n twee uur lange program uitsaai – eg Afrikaans!

Ons is deel van die gemeenskapstasie 94.7 The pulse se etnieseprogramskedule elke Woensdag van 20:00 tot 22:00 (Australiese oostelike standaardtyd). Ons speel die nuutste en ook ouer Afrikaanse musiek en gesels van tyd tot tyd met kunstenaars oor hul musiek en nuwe vrystellings. Ons program is propvol  interessante feite en ons bemark ’n verskeidenheid van aktiwiteite sowel plaaslik as in Suid Afrika. Ons bemark gemeenskapsaktiwiteite van oraloor, as jul dit met ons wil deel. Stuur gerus vir ons ’n e-pos of ’n boodskap sodat ons dit met ons luisteraars kan deel. Ons besonderhede verskyn onderaan hierdie artikel.

In ons tuinbou-insetsel genaamd Die tuindwerg met sy groen voete gesels ons weekliks oor alles wat in jou tuin aangaan. Indien jy wil saamgesels, is jy ook baie welkom om vir ons jou vraag per e-pos of boodskap te stuur.

Ons het twee mediaborge, naamlik AfriForum Wêreldwyd en Maroela Media. Ons het ook ’n verskeidenheid van musiekborge wat by die program betrokke is, soos Starburstmusic, Vonk Musiek, Tania Fourie Promosies en ’n verskeidenheid van kunstenaars wat direk met ons skakel. Ons ontvang graag nuwe en opkomende kunstenaars se musiek.

Ons is tans besig om na Liz Meiring se boekvoorlesing te luister wat sy self geskryf het. Daar is ook ons radiodrama “Operasie Umbra” uit die pen van Joe Kleinhans, wat deur Bettie Kemp in samewerking met Maroela Media vervaardig is.

Ons gesels ook elke tweede week met Alta Reyneke in Groblersdal oor interessante inligting, lewensfeite en waarhede, asook oor lande waarin sy gewoon en waarheen sy gereis het. Sy is ook binnekort op pad na Ethiopië, waar sy en haar man ’n plaas gaan bestuur. Haar man is reeds daar en sy kan nie wag om by hom aan te sluit nie.

Indien jy met ons wil gesels, kan jy ons direk in die ateljee by +61352225947 skakel.

WhatsApp: +61423844008
Facebook-blad: https://www.facebook.com/947strandloper/
Webtuiste: www.947thepulse.com
TuneIn-toep: http://tun.in/seUCT

Gaan laai die Community Radio Plus-toep van jou foon se toepwinkel af.

Indien jy nie regstreeks na ons kan luister nie, kan jy gerus na enige van ons vorige programme gaan luister deur op die “Luister weer”-afdeling in ons programskedule op 947thepulse.com te klik. Daar is tans meer as 70 vorige programme waarna jy kan gaan luister.

Similar Posts