Onderneming in die Kollig: Khoi Khoi Bar and Braai

Dié week se onderneming in die Kollig is Khoi Khoi Bar and Braai in Letchworth, Engeland.

Khoi Khoi Bar and Braai is gratis op Wêreldwyd se Wêreldgids gelys. Dié gids stel mense in staat om Suid-Afrikaanse ondernemings in die buiteland te ondersteun.

Khoi Khoi Bar and Braai is Letchworth se topkeuse as dit kom by musiekvertonings, met die keur van kunstenaars van die VK en ander lande wat elke aand op die verhoog te sien is. Geniet die unieke smake van disse met ’n Suid-Afrikaanse tema wat in ons regte-egte koolstoof voorberei is.

Ons is trots daarop om ons gaste met ’n unieke Khoi Khoi-ervaring te bederf en daar is vir ons niks lekkerder nie as om die plaaslike gemeenskap te dien met passie en regte Suid-Afrikaanse gasvryheid.

Ons storie is een van saamwees; ons vier die lewe deur musiek en dans, teater, die gesproke woord, verhoogkomedie en kabaret – alles word opgevoer op ons verhoog.

Ons wil dit maklik maak om menslike verbintenisse en vriendskappe te vestig deur drankies, musiek en dans in ’n lekker lewendige atmosfeer. Ons kroeg het genoeg voorraad van ’n indrukwekkende versameling wyn, bier, skemerkelkies en sterker drank waarvan ’n groot deel Suid-Afrikaans is.

Of jy ’n plaaslike inwoner is en net ’n lekker aand uit beplan, of slegs iewers heen op pad is deur die dorp, ons het ten doel om vir jou ’n smakie te bied van iets effens anders, in die hartjie van Letchworth Garden City.

Ons is jou perfekte keuse, hetsy dit is vir ’n eerste afspraak, sake-ete, ’n herdenking, verjaarsdagpartytjie of net kuier saam met vriende terwyl julle ’n glas van ons spesiale versameling van die wêreld se beste drankies geniet, of die unieke smaak van eg Suid-Afrikaanse kos.

AfriForum Wêreldwyd se Wêreldgids is waar Suid-Afrikaanse ondernemings van regoor die wêreld bymekaarkom om ’n gemeenskap te vorm. Die Wêreldgids beskik tans oor meer as ’n duisend ondernemings en kontakpunte.

Vat die kans en word deel van hierdie netwerk. Netwerke is nie net ondernemings nie; dit is ook ’n waardevolle wyse om ’n ondersteuningsbasis te bou vir daardie dae wanneer die verlange na ’n goeie Suid-Afrikaanse wyn, kuier om ’n braaivleisvuur en die onmisbare Afrikaner-gasvryheid te veel raak.

Similar Posts