Paneelgesprek oor die betekenis van ons kultuurerfenis – neem gerus deel!

Op 21 Februarie 2022 gaan ’n paneelgesprek oor die betekenis van ons kultuurerfenis aanlyn plaasvind. Esmarie Yssel sal as gespreksleier optree en die paneel bestaan verder uit dr. Wikus Buys, die uitvoerende direkteur van die Begrond Instituut vir Christelike Grondslagstudies; Alana Bailey, AfriForum se hoof van kultuursake; en Bernard Pieters, die nasionale bestuurder van AfriForum Jeug.

In 2021 het AfriForum, AfriForum Jeug en Begrond saam ’n peiling onderneem om vas te stel hoe mense oor erfenis voel. Tydens die paneelgesprek gaan die resultate van die peiling bekendmaak word en sal die kundiges verder gesels oor waarom die bewaring van alle aspekte van ons erfenis steeds van belang vir Afrikaners moet bly.

Van die vrae wat aangespreek sal word, is of geld as enigste erflating vir ons nageslag genoeg is; of die oprigting van standbeelde en monumente gelyk aan afgodery is; waarom standbeelde geteiken word as dit dan nie saak maak nie; of erfenisbewaring geldmors is; en hoe ons monumente van die toekoms moet lyk?

Stuur jou vrae in aan wereldwyd@afriforum.co.za en kyk aanlyn saam op AfriForum se You Tube-kanaal op 21 Februarie 2022 vanaf 09:00 Suid-Afrikaanse tyd.

LEES OOK: Internasionale Moedertaaldag 2022

Similar Posts