Uit en Tuis: ’n E-pos uit China

Uit en Tuis is ’n rubriek waar ons met mense gesels wat tans in die buiteland woon, of wat daar gewoon en gewerk het.  Hierdie week gesels ons met Elle en Wes van Wandering feet ZA.


Hallo Elle en Wes, dit is baie lekker om met julle te gesels. Waar in die wêreld woon julle?

Ons woon in Shanghai, China, al vir die vir afgelope 5+ jaar.

Wat is vir julle die gunstelingdeel van reis in ’n nuwe land?

Ag, enigiets wat heel anders is, is vir ons spesiaal. Die Engelsman sê, “Magic happens where your comfort zone ends,” so ons gaan maar waar ons bietjie moet sukkel met die taal en waar die mense en die kos heel anders klink en proe, om ons horisonne te verbreed.

Wat was die grootste aanpassing in China?

Die mense! Suid-Afrikaners is warm, plesierig, oop, vry, ons mense hou van lag en is positief en hoopvol, maak nou nie saak wat in die wêreld aangaan nie. Die mense hier is ’n bietjie anders. As Suid-Afrikaners is dit vir ons belangrik om ons medemens te help en by te staan. In China is dit nogal moeilik want hier is hulle baie trots en aanvaar baie moeilik hulp van ander mense.

As jy ’n pakkie van die huis kon ontvang, wat sal daarin wees?

Hoe groot kan die pakkie wees? Sit asseblief Tafelberg binne-in! ’n Mens kry redelik baie goed hier soos Ouma-beskuit en Ina Paarman se speserye en daar is selfs ’n paar mense wat vleis invoer om biltong te maak en te verkoop. Maar ek sal nogal groot geld betaal om my ma se hertzoggies en melktert in ’n pakkie te ontvang.

Hoe verskil die kos in China van die in Suid-Afrika?

Die grootste verskil is seker hoe die mense gewoonlik eet. Ons hou van pap/graankos of roosterbrood vir ontbyt, maar hier kry jy ’n groot bak noedels of ryspap met mielies en patat. En dan is middagete en aandete ook groot met rys en vleis of vis met groente vir albei maaltye. Mense eet ook meestal in restaurante of bestel kos om afgelewer te word.

Het julle planne om in nog ander lande te woon?

Definitief. Ons het Afrika en Suid-Amerika in die oog …

Hoe lyk ’n eenvoudige werksdag in China vir julle?

As onderwysers is dit redelik dieselfde as in Suid-Afrika. Maar, die skooldag is lank, kinders maak eers 16:00 klaar met die dag se lesse en onderwysers neem dan minder werk huis toe. Die stad is vol dinge om te doen en geniet. Ná skool kan jy maklik ’n dans- of kunsklas bywoon, gaan draf by die rivier, of foto’s neem by die ikoniese geboue, strate en tempels, ’n Michelin-sterrestaurant besoek of met ’n spoedtrein na ’n ander dorp of watertown toe ry. Elke dag het die potensiaal om iets nuuts te bring en dis wat dit opwindend maak.

LEES OOK: Uit en Tuis: ’n E-pos uit Pole

Similar Posts