Kan ek ’n Suid-Afrikaanse bankrekening oopmaak as ek in die buiteland woon?

Daar is aan alles in die lewe koste verbonde, hetsy dit ’n kontantprys of emosionele koste behels. Emigrasie is g’n anders nie. Lewe in die buiteland is duur en die prys wat jou geestesgesondheid betaal, kan veeleisend wees. Jy loop dalk met vrae wat rondskommel in jou gedagtes.

Die lewe vereis van emigrante, nes van enigeen wat ’n gesonde lewe wil leef, om wys te wees met finansies, maar daar is ’n reeks fyner besonderhede waaraan ’n mens moet aandag skenk om sukses in hierdie afdeling te behaal. ’n Groot vraag op ekspats se lippe is, “Kan ek ’n Suid-Afrikaanse bankrekening oopmaak as ek in die buiteland woon?” Dit is juis hierdie vraag wat ons beoog om te beantwoord. Lees gerus verder.

Die opening van ’n bankrekening as nie-inwoner

By die meeste Suid-Afrikaanse banke word jy toegelaat om as inwoner of nie-inwoner ’n rekening oop te maak. Die twee aansoekprosesse verskil egter van mekaar, aangesien inwoners enige tyd by die bank se voordeur kan opdaag en dit nie juis vir emigrante so eenvoudig is nie.

Die grondslag bly dieselfde: jy moet bo die ouderdom van 18 wees en ’n geldige identiteitsdokument byderhand hê om ’n bankrekening oop te maak. Om egter ’n Suid-Afrikaanse bankrekening oop te maak terwyl jy in die buiteland woon, word ’n gewaarmerkte brief van ’n prokureur as deel van jou aansoek vereis.

Wat anders het ek nodig?

Om die bal aan die rol te sit by enige bank, sal jy gewaarmerkte kopieë van die volgende dokumente nodig hê:

• Jou paspoort
• Verblyfsbewys jonger as drie maande
• Drie maande se bankrekeningstate, voorsien deur jou bank in die buiteland
• Bewys van inkomste

Daaropvolgende vereistes kan wissel van onderneming tot onderneming. Maak dus seker dat jy toegang het tot die bank se kontakbesonderhede.

Kies die bank wat reg is vir jou

Om ’n bank te kies is soos om ’n nuwe verstandhouding aan te knoop: jou behoeftes moet ooreenstem met dit wat die ander party jou bied. Werk dus deur hierdie lysie as riglyn om jou besluite te lei wanneer jy ’n bank kies:

• Hoe werk die bankkoste? Betaal jy jaarlikse of maandelikse fooie?
• Word jy toegelaat om gereeld geld te trek of is daar beperkings?
• Kan jy by enige kontantpunt geld trek of deponeer?
• Sal jy van ’n kitsbank gebruik kan maak?
• Wat is die rentekoers op jou geld?
• Is daar elektroniese of telefoniese dienste beskikbaar?

Doen sorgvuldige navorsing

Voordat jy ’n bankrekening in Suid-Afrika oopmaak, is dit van kardinale belang dat jy goed vertroud is met die onderneming en sy unieke vereistes. Ons raai jou dus aan om Suid-Afrikaanse banke deeglik na te vors, want alhoewel jy in die buiteland woon, is dit tog moontlik vir jou geld om tuis te bly.

Foto: andrew-neel-unsplash